Avis de concurs

ISTITUZION DL CONCURS

Art. 1 – L Pest MARIO RIGONI STERN PER LA LETERATURA MULTILINGUALA DLES ALPES é nasciù per sostegnì l svilup dl contest cultural de deplù lingac tles Alpes, tres n Concurs de merit per ovres de narativa y sagistica dedichedes a les Alpes, a si ambient y a sies comunités. Istituì con l obietif de onoré Mario Rigori Stern y sies ovres, vuel l Pest jì inant sun l troi di valours de fraternité anter i popui, de respet per l ambient, de umanité alpina.

Art. 2 – Al Concurs pò tò pert contribuc de Narativa y de Sagistica. Les ovres pò vegnì proponudes da editours, dai autours enstesc o da chi che à l dert.

GIURIA Y PESĆ

Art. 3 – La giuria litarà sie President che messarà sourasté ai laours y che vegnirà daidé da n secreter nominé dal Comité organisadour, per l coordinament y per mete a jì les desposizions publiches.
L giudìze dla giuria ne pò nia vegnì metù en discuscion. La giuria é metuda adum da 5 (cinch) persones, ala vegnirà nomineda dal Comité promotour y ala tolarà ite reprejentanc de prestije dl mond cultural y scientifich. La giuria podarà damané la colaborazion de esperc reconescius per i lingac y i argomenc che va soura sies competenzes fora.

Art. 4 – L Pest “Premio Mario Rigoni Stern” sarà per l 2017 de 10.000 (diesc mile euro) €. Aldò dl giudìze dla giuria, podaràl vegnì sourandé a la mioura opera de Narativa, al miour contribut de Sagistica, o vegnì spartì te does pertes valives anter les does sezions. La giuria podarà segnalé ence ovres de merit, ma nia plu che trei. L Pest vegnirà sourandé te na zerimonia ai 17 de jugn 2017, a chela che l davagnadour/davagnadours y i autours segnalés messarà tò pert.

CONDIZIONS PER TÒ PERT

Art. 5 – Al pò vegnì mané ite ovres dedes fora (publichedes te forma convenzionala sun papier con numer ISBN) de autours en vita, de argomenc liés a les Alpes, te un di lingac rejonés tl raion alpin, anter chisc, per ejempl, franzeis, ozitan, francoprovenzal, talian, todesch, rumanc, ladin, furlan, sloven, y ence te cheles variantes locales che à na ortografia normeda. I tesć mess ester vegnus publichés ti doi agn dant l termin anual dla bandida dl concurs.

Art. 6 – Les ovres mess vegnì manedes al Secretariat dl Concurs anter i 31 de merz dl 2017.

Art. 7 – Vigni ovra che tol pert messarà vegnì maneda ite te 6 copies, con laprò i dac y la miscion dl Autour, a la “Segreteria della Giuria del Premio Mario Rigoni Stern c/o Museo degli Usi e Costumi della Gente Trentina via Mach 2 – 38010 San Michele all’Adige (TN). Les copies ne vegnirà nia plu dedes endò.

Art. 8 – Con la partezipazion al Pest declareien l’azetanza de chest regolament.