Motivazion dl premie

 

La jent da mont se à endrezé sies comunités te n ambient natural dassen unich, te na rei de tradizions culturales desvalives liedes a les carateristiches de sie teritore. Al se trata de n univers cultural marevueious y desvalif, olache toleranza y solidarité é valours de gran emportanza, n raion de confin anter nord y sud, anter l raion mediteran y l raion dla Mitteleuropa: na “zivilté alpina” en dut y per dut, logheda tl cuer dl’Europa, con si valours, con sies conescenzes culturales y artistiches, che raprejenta encueicondì n model straordinar de referiment per l’Europa di popui che vegnirà.
Na gran emportanza acioche les truepes cultures dles Alpes se conesce y se confronteie àl segur la Leteratura, te dutes sies esprescions: sibe tres la enrescida y la divulgazion storich-scientifica, sibe tres la contia, che la conta les emozions y i sentimenc dla mont, portan dant i valours ciamò encueicondì vifs tles comunanzes che sta ti luesc da mont.
Tla leteratura taliana dl Nuefcent, é Mario Rigoni Stern sté bon de descrive a na vida originala la cultura dla jent da mont, con l conté l liam anter la jent y sie ambient, y portan dant les Alpes desche element zentral dla leteratura y dla storiografìa d’al di da encuei, dl modern sentiment ecologich y dl’etica.

Te chest contest deventa les Alpes n scrin de valours che ne reverda nia demé l paesaje y l ambient, ma souraldut l om: na dimenjion etica che Mario Rigoni Stern ne à, dal “ritorno a baita” tant dejidré tl freit dla stepa maceda dai orours dla vera, mai lascé su de chirì y de palesé, desche naratour, ma ence desche inteletual che se dà ju te n projet de reventa y de progres de sie mond.